Budapesterako 26 tranbiako hornikuntza esleitu dute

26 tranbia hornituko ditu CAFek Budapest hirirako eta horiek BKK-k (Budapesti Közlekedési Központ), hiriko garraioaz arduratzen den enpresak, erosiko ditu. Kontratuak 2 tranbia motaren fabrikazioa biltzen du; haietako 21 tranbia 5 modulukoak izango dira, eta gainerako 5 ibilgailuek 9 modulu izango dituzte. Lehen entregak 2019ko otsailetik aurrera egingo dituztela aurrez ikusi dute eta kontratuaren bolumena, gutxi gorabehera, 55 milioi eurokoa da.

2014ko martxoan, CAFek lehen kontratua sinatu zuen bezero horrekin. Kasu hartan, 37 tranbia-unitate izan ziren eta gerora kontratua handitzeko aukera ere biltzen zuen. Hain zuzen ere, handik hilabete batzuetara, 10 unitateko lehen handitze-proiektua esleitu zuten. Haiek guztiak dagoeneko bidaiarientzako zerbitzuan daude eta bi eragiketa haiei esker, bolumena 115 milioi euro baino gehiagokoa izan zen.

Hungariako hiriburua izan zen hiriko garraiobide hori erabiltzen hiri aitzindarietako bat eta gaur egun trenbide-sare zabala du. Guztira, 40 linea inguru ditu eta Europa osoan bidaiari gehien garraiatzen dutenetarikoak dira haietako batzuk. Hori guztia dela eta, bereziki nabarmendu beharrekoa da hiriak berriro ere CAFek fabrikatutako ibilgailuetan konfiantza jarri izana.

Budapesterako proposatutako tranbiak Urbos plataformakoak dira. Zoru baxuko ibilgailuak dira, bi noranzkotakoak, eta bost moduluko tranbiak albo bakoitzeko lau ate bikoitz ditu, eta bederatzi moduluko tranbiak, berriz, zazpi ate bikoitz. 1435 mm-ko trenbide-zabaleran, 50 km/h-ko zerbitzu-abiaduran, zirkulatzeko prestatuta daude.

Bost moduluko tranbiek, 34 metroko luzera dutenek, 326 bidaiari arte garraiatzeko edukiera dute. Aldiz, bederatzi moduluko tranbiek, 56 metroko luzera dutenek, guztira 562 bidaiari garraia ditzakete (horixe da munduko tranbia luzeenetako bat). Tranbiaren azalera guztia altuera bakarrean dago eta, horri esker, mugigarritasun mugatuko pertsonek sarbide erraza izango dute, gurpildun aulkia edo haurtxoen orgatxoak erabiltzen dituztenek barne (ibilgailu bakoitzeko bi gune egongo dira horretarako).

Horixe izango da hasi berria dugun 2018 honetarako CAFen lehen proiektua eta horrek aurreko ekitaldia itxi zuenean erakutsitako eskarien zorro handia sendotu du. Gainera, kontratu berri horrek enpresak Europako tren-merkatuan duen presentzia handia berretsi du.

Jatorrizko albistea: http://www.caf.net/eu/sala-prensa/nota-prensa-detalle.php?e=234

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.